藝人車婉婉，今年3月就為中澳混血兒老公Jonathon生咗囝囝「BBQ」，一家三口可謂幸福滿瀉！車婉婉不時都會上載囝囝嘅新相，同大家分享佢作為新手媽媽嘅喜悅，尋晚佢就上載咗抱住囝囝嘅相，不過望真啲，點解BBQ好似唔同咗樣嘅？原來車婉婉抱嘅唔係BBQ，而係蘇永康個囝囝蘇展弘（Jazz）。
事關車婉婉噚日就同蘇永康個老婆Anita去咗high tea，交流湊仔經之餘仲畀佢兩個囝囝傾吓偈。相中嘅BBQ仲好主動咁拖住Jazz隻手，而且仲口擘擘，可愛指數爆燈！Jazz就好淡定咁望咗去第二度，完全冇理過BBQ，認真搞笑。
而車婉婉仲話：「BBQ一貫以熱情的態度和Baby Jazz溝通，而Baby Jazz亦很喜歡和人傾偈，我相信是有Baby Language的，他們玩了一陣便決定一起乖乖的睡覺，一點也不妨礙MaMa們下午茶傾計（偈）活動、真懂事，生性。」
唔少網友都話佢BBQ同Jazz好似孖仔，唔知佢哋兩個會唔會做結拜兄弟呢？
(on.cc東網)
