藝人陸永太太Reina（陳莉娜）昨晚透過社交網發聲明。。。
藝人陸永太太Reina（陳莉娜）昨晚透過社交網發聲明，指有關一位陳姓先生及某材料工程公司對外一切行為及或金錢糾紛，一槪與她無關，並強調若有人以她丈夫藝人身份向她作出任何要脅、騷擾等行為，她定會報警處理，並保留一切法律追究權利。
與生父關係疏離
身在丹麥工作的陸永剛透過短訊回覆東網，就太太出聲明一事，陸永說：「太太發出聲明入面所講嗰位陳生，就係太太嘅生父，但太太爹吔媽咪喺佢好細個就離咗婚，太太同爸爸一年食飯見一、兩次，但太太因為爸爸一啲欠債畀人騷擾、滋擾得好犀利。」
美容院不停受騷擾
陸永解釋太太在一年前跟朋友夾份開了一間美容院，美容院進行裝修時，就搵了這位做裝修工程的爸爸幫手，當工程完成時已經付清尾數，到美容院營業時，不停有不同部門的工人及其他人上來收錢，陸永說：「佢哋話收唔到錢，我哋先知道有件咁嘅事，期間佢哋受到相當多滋擾，又打電話騷擾，我太太都冇法處理到，之後太太索性退股離開間美容院，去到最近唔知係咪有另一啲債主，又去騷擾嗰間已經唔係屬於我太太嘅美容院，同時又打電話不停話要搵我太太出嚟，甚至最近仲話要搵埋我出嚟，所以我哋發覺咁嘅情況，其實嗰啲債主應該要搵陳生處理，呢個係佢自己私人事務，我哋已經幫唔到佢，其實喺呢件事發生之前，我哋唔知佢咩原因欠人錢，但我哋係有幫佢，當借錢畀佢，但當我哋知道呢件事後，不停遭人騷擾，我哋真係幫佢唔到，呢啲可能睇唔到仲有幾多嘅債。」
聯絡唔到
陸永表示即使他們要去幫陳生，都冇法做到，因為對方從不現身，他說：「我哋搵唔到陳生，我哋上幾次聯絡到佢，都係經中間人，某啲親戚嘅親戚先打到畀佢，每次佢都話會處理，但之後都冇處理仍然咁樣，所以我哋覺得好騷擾，我又擔心我太太，所以冇辦法下先出聲明。」
