講到教育方法。。。
麥明詩媽媽麥何小娟，上年書展出咗本書《我的女兒麥明詩》，分享佢嘅教育方法。留意番，麥何小娟絕對唔係「借阿女上位嗰個」，因為佢真係喺教育工作花咗30年光蔭，讀過2個碩士課程，絕對夠資格講點教女。
入番正題，麥何小娟冇特別check功課，反而着重培養小朋友嘅專注力、創造力同逆境智商咁。麥明詩喺書中寫序就話，補習唔多，返屋企會自動波溫書，仲有一樣，就係麥媽媽教識佢溝通同洞察世情，畢生受用。有教學經驗，麥媽媽得心應手，冇嘅，可能就要從錯誤中學習。
楊千嬅早排被發掘一篇15年嘅訪問，話阿仔Torres鍾意粉紅色、煮飯仔云云，好驚。呢段經歷令千嬅成長，佢話從其媽媽身上面，學識建立信心，最終見證住Torres由《魔雪奇緣》出發，培養咗閱卷興趣；因為喜歡煮飯仔，食到阿仔親手整嘅蛋糕。
森美之前喺活動自認管教嚴厲，對仔女嘅感情有獨特處理方法，佢話希望小朋友早啲拍拖，佢試過知道阿仔被傳同女同學拍拖，就約位女同學、女同學家長見面，目的係想小朋友知道家長係好開通嘅。不過咁，原來只係對阿仔嚴，對阿女就呵護有加。因為阿女好有自覺，做完功課會主動要求買補充練習，咁乖，梗係錫晒佢啦。
(蘋果日報)
