當時覺得二人感情仍然友好，可能婚姻有得掹，所以未有即時答應，點知等咗一年。。。
43歲陳煒保養得宜、演技又正，又肯瞓身去演，絕對勝過一眾上位小花，喺大台發展唔錯，而處理感情上，煒哥一向好低調，就算5年前台灣富商老公顏志行，主動提出離婚，煒哥都係獨自返港搵食，靠友人同工作捱過傷痛，亦冇講過前夫壞話，直至有報道指「老公」戀上台灣歌手鄭雙雙，見鄭雙雙無啦啦變咗「小三」，煒哥先認已離婚。
今日有周刊指，煒哥於2012年離婚後返港，冇地方住，當時前夫提出買樓俾佢當贍養費，但煒哥覺得二人感情仍然友好，可能婚姻有得掹，所以未有即時答應，點知等咗一年，發現關係冇改善，反而事業發展幾好，煒哥先決定接受前夫嘅安排，喺2014年由前夫出錢買咗貝沙灣一個高層千呎豪宅，市值二千幾萬，煒哥揸咗一年，就以3千幾萬賣咗，轉手賬面賺650萬。有錢揸手嘅煒哥，之前都有被周刊影到同一個中佬去睇三級片，不過見有記者在場，佢就話對方只係朋友，據知當時個中佬都想追煒哥，但係為咗前夫面子，又未公開講已離婚，所以就同中佬冇再聯絡，而宣佈回復單身後，煒哥亦繼續為事業努力，同前夫再見亦是朋友。
(蘋果日報)
