陳茵媺(Aimee)自從嫁畀陳豪，火速為對方誕下兩仔一女後，一直退居幕後專心相夫教子，對上一次幕前演出，已經係兩年前杜汶澤嘅電影《開飯啦》，今日Aimee正式復出 ，接拍導演劉偉恒嘅電影《日月星》，電影背景為90年代嘅校園生活，Aimee飾演一位英文老師，同湯怡、原島大地等演員做對手。
今日Aimee同一班劇組人員，就喺清水灣三育中學進行拍攝，着起深色套裝戴住圓框眼鏡嘅Aimee，成個教師Look造型。佢話重新投入拍攝工作覺得好開心，佢話：「開頭第一、二個場口有少少唔習慣，但好快就適應到，雖然唔係拍咗好多年嘢，但我好鍾意拍，所以適應得到。」
講到戲中Aimee係原島大地嘅教師，仲會教對方追女仔添，佢話：「雖然我角色係教師，但一啲都唔惡，係比較嚴肅啲啫。」重新開工嘅Aimee有冇好唔捨得三個仔女？佢話：「都有㗎，我出門口嘅時候佢哋就黐住我，問我去邊度。尤其係大仔同細女特別黐身，係咁問我媽咪你做咩嘢㗎？你去邊呀？我要解釋畀佢聽媽咪係Actress(演員)， 跟住佢哋就繼續問What is Actress？會一路問落去。」
Aimee又透露，老公陳豪啱啱完成手頭上嘅劇集，o依家可以喺屋企休息吓兼湊仔，佢話：「雖然話拍完係休息，但其實湊佢哋幾個都好攰，不過我知道佢好Enjoy嘅。」除咗呢套電影外，Aimee透露嚟緊都有唔同嘅工作接洽，但首要都係照顧三個仔女為大前提，佢話：「其實我同阿Mo都會盡量就時間，盡可能保持我哋是但一個家長喺屋企照顧佢哋。」
講到無綫有冇接洽過佢？Aimee話：「有同我傾過，但拍電視劇時間比較長，一拍就要三、四個月，而且要朝早、夜晚接住咁拍，比較難安排。」咁以後咪再見唔到同老公夫妻檔演出？佢話：「要睇時間睇劇本啦，我又唔會話冇可能嘅，係都要睇下點安排。」早前已開始積極修身嘅Aimee又表示：「之前喺多倫多每日都做運動，o依家已經可以着番00碼嘅衫，老公都有Keep住同我一齊做，大家個身型線條都靚咗同健康咗。」
