佢又講到：「既然靚仔同唔靚仔都會有問題，當然揀靚仔啦！好又一餐，唔好又一餐，咁我就食好啲啦。。。
多年前嘅劉美君工作日接夜、夜接日，身為人哋老婆、阿媽以及阿女嘅佢每日只有幾個鐘休息。雖然工作為佢帶來好好嘅收入，可惜佢過得並唔開心，更開始迷失自己，當年佢決定放棄事業走到美國展開新生活，更展開一段新感情，雖然最終第二段婚姻都係失敗收場，不過就令佢更堅定自己嘅信念。
1982年，當年只得18歲嘅劉美君喺普遍唔太認同早婚嘅年代嫁咗俾身為導演嘅黃泰來，兩年後誕下大仔，當時事業正值高峰嘅佢，忙到連做嘢都要帶埋阿仔去湊，4年後，即劉美君24歲時再誕下囡囡，不過已經肓有一子一女嘅佢同老公最終未能走到白頭，喺1992年，劉美君就宣佈結束10年婚姻，同黃泰來正式離婚。雖然分咗手之後佢哋仲係朋友，但係劉美君喺94年因聲帶生繭要停工休養，佢就趁呢個機會帶埋一對仔女同屋企人去到美國生活。
移居美國後，劉美君由好友林憶蓮介紹底下認識第二任丈夫，兩人喺97年開始拍拖，2002年結婚後，喺2005年再誕下一女，可惜到咗2008年劉美君再次宣佈離婚，喺一次訪問時佢就話：「一直以來接受訪問，都唔會講前夫半句壞話。」咁其實點解離婚呢？佢就話：「係我嘅問題，我對唔同嘅事，都有好高要求，令人好辛苦。」更表示：「我都唔想件事發生，終結係好可惜，好彩身邊有好多好朋友、媽咪同我傾，媽咪都好支持我嘅決定，而且唔係我一個決定要離。任何事嚟就嚟，走就走，我唔會想再結婚，我都冇諗過會結第一、第二次婚，雖然結婚係一件好靚嘅事。」
經歷過兩次婚姻失敗嘅劉美君，坦言對愛情絕對投入，所以以往將愛情睇得好重，佢話過：「o依家覺得血緣關係好重要，有愛情生命就豐富啲，就好似食飯多味甜品，我對男朋友冇乜要求，只要坦誠相處、忠心已經好足夠。」接連遇到挫折後對愛情冇失去信心嘅佢話以前揀老公專揀唔靚仔，佢笑指﹕「爸爸年輕時都幾靚仔，但就有過三段婚姻，所以我一直對靚仔冇信心，覺得自己配唔起靚仔。但後來發覺都係唔work，原來唔靚仔都會有問題。」現時有個拍拖已經8年嘅靚仔男友Steve，劉美君就話自己醒目咗：「既然靚仔同唔靚仔都會有問題，當然揀靚仔啦！好又一餐，唔好又一餐，咁我就食好啲啦。」
(蘋果日報)
