近日憑JTBC熱播劇《有品位的她》而人氣急升嘅金喜善，於綜藝節目《我家的熊孩子》擔任嘉賓。
金喜善亦繼續提到自己家庭事。金喜善坦言愛女無論係性格定樣貌，都係似老公多啲。
「佢嘅性格同爸爸好似，唔會做啲激嬲人嘅舉動，就好似喺佢2、3歲時我就已經教佢要講敬語，所以係從小養成嘅習慣。」
「而且有時我開住水龍頭刷牙嘅話，佢就會入嚟關水龍頭，唔使浪費水，有啲地方佢做得好過我，所以我都好少鬧佢。」
及後金喜善表示自己曾打算退出娛樂圈，令在場人士大感震驚。
「以前曾經公開囡囡嘅相，但因為有太多『好醜樣』嘅評價，所以我好後悔公開咗。雖然我難以理解啲人點解可以咁樣話小朋友，但囡囡係因為我咁做先畀人批評，心情好難過，當時後悔到甚至想離開韓國。」
被問到婆媳關係，金喜善稱與奶奶就好似母女咁，相處得好好，又指同老公嗌咗交嘅話奶奶會幫自己多過幫老公，相當爆笑。
(Apple Daily)
