人妻鍾嘉欣自從做咗媽咪後，就算頻撲快閃返港出席活動，都要帶埋心肝寶貝Kelly同行，又不時喺社交網貼囡囡可愛相，母愛滿瀉；相反，由於脊醫老公Jeremy Leung好低調，嘉欣絕少貼老公相片，今日就極罕喺社交網貼老公合照晒愛，兩公婆拍住拖跳起落水，隔住個mon都feel到甜蜜蜜。
嘉欣BB原來唔識游水㗎，身在溫哥華享受家庭樂嘅嘉欣，趁天氣好同老公玩鴛鴦戲水，留言晒愛：「我不懂游泳，但是沒關係，有愛的人在身邊和美好的風景。我覺得十分安全。我決定跳落水。很爽！」雖然只係得個背脊，老公依舊冇樣睇，嘉欣BB上身仲要有件T恤，只可見到一雙美腿嘅剪影，着住救生衣嘅嘉欣BB高舉V字手勢，喺老公傍住下齊齊跳落水，網友都留言讚：「幸福梁太」、「嘉欣BB好勇敢」、「老公仔咁瘦嘅」。
(蘋果日報)
