15年港姐季軍郭嘉文，自從做咗「楷女郎」，就專心做跟得女友，嚟緊今個月先至25歲嘅佢，近月同楷楷愛得高調，除咗俾人影到陪男友李澤楷到香港木球會，又拍拖飛新加坡旅行，煙韌到暈。
噚晚，郭嘉文就喺IG貼咗張生日相，相中雖然只得郭嘉文一人，但佢就好冧咁拎住個寫上Happy Birthday Karmen嘅汽球，面前就有個蛋糕同甜品。
郭嘉文留言話：「踏入八月，第一餐生日飯。」再hashtag#好欣賞無cream嘅蛋糕#心思禮物最珍貴。今年3月，郭嘉文以個人名義，以1.068億，買入九龍塘逸瓏天池屋，裝修近半年，年底前應該都入得伙。唔知第一年同男友過生日嘅佢，又會收到啲咩禮物呢？
(蘋果日報)
