現年50歲嘅前港姐陳法蓉近年注重作息，已減少幕前嘅產量以享受生活。呢日佢突然喺微博晒出2001年嘅古裝劇《小寶與康熙》舊照，並留言：「舊日的足迹。」
照片中，當年嘅演員張衞健、朱茵、陳法蓉、吳辰君、張茜等齊齊入鏡，大家樣貌青澀，面上仲帶有幾分稚氣，簡直係男嘅型，女嘅索！
呢幾張相一曝光，即引來網友無限回憶。
唔少人都話好羨慕張衞健可以畀一班靚靚「老婆」圍，佢哋紛紛留言：「好喜歡這部劇」、「真的好喜歡這部電視啊，好喜歡你扮演的龍兒」、「怎麼沒有林心如和舒淇呢」。
仲有網友唸出「小寶」張衞健嘅名詩：「涼風有信，秋月無邊，虧我思嬌嘅情緒好比度日如年，雖則我唔係玉樹臨風、瀟灑倜儻，但我有廣闊嘅胸襟加強勁嘅臂彎！」真係見字有聲呀！
(on.cc東網)
