陸永太太帶人有三急嘅大女Hannah，喺商場傷殘人士洗手間加育嬰室解決，惹嚟一位女士嘅微言。
陸太仲要即時道歉，呢件事就引嚟好多網民戥陸太同囡囡唔抵。
陸永接受訪問時，話太太道歉係正確做法。
「件事就係咁，嗰位街坊覺得唔好，出聲話吓佢哋（太太同囡囡），我太太就道歉話唔好意思，我覺得咁做係啱嘅，始終殘廁係有殘廁人士嘅需要，講到育嬰板，咁梗係嬰兒用，我個女唔係嬰兒吖嘛，我老婆知唔啱，但小朋友太急，對唔住。」
陸永仲話人哋體諒只係人情。
「如果環顧四周冇人，小朋友好急咪衝入去囉，如果出嚟見到有人話：『我等你好耐喎。』咁始終唔係傷殘人士，都係有錯。」
「佢（太太）道歉係處理得好好，畀小朋友知唔可以喺街爭執，小朋友基本上唔知咩事，亦唔可以畀佢覺得我做錯咩呀？或者媽咪做錯咩？我哋都係一貫作風，總之令人不便就會道歉。」
陸永又不認為對方麻煩。
(on.cc 東網 )
