42歲陳昭昭同拍拖2年半，感情幾經波折嘅男友Frankie Lee，於今年12月拉埋天窗，噚日佢哋去尖沙嘴影婚紗相。
快將榮升做人妻，昭昭話會搵好姊妹林雅詩同仙樂都會擔任姊妹團：「同導演諗緊婚禮節目，到時會當一個騒去搞，到時有三機拍攝，之後會上載到YouTube。」昭昭笑稱老公好怕醜，今日都係呃住對方，唔話佢知有傳媒在場：「佢已經好合作，今日都係欺騙佢嚟影相。佢唔知有記者，頭先話畀佢聽都OK。」但見李生在鏡頭前真係好緊張，成日望天唔敢正視昭昭。
對於婚禮安排，昭昭表示按照傳統入教堂，接新娘同着裙褂，夜晚就喺酒樓擺酒。準新娘話依家珠圓肉潤，心廣體胖，比起最佳狀態肥咗十磅：「好彩有間美容院贊助我減肥，希望到時有最佳狀態。」對於陳昭昭如何被男友感動，佢話未婚夫做咗好多嘢：「佢之前飛去柬埔寨搵我爹哋，同我爹哋解釋之前有啲嘢做得唔係咁好，佢行屋企人政策，同埋佢有誠意，求婚嗰陣都有小插曲，佢將求婚戒指擺落飯盒，我食食下飯，因為唔舒服將個飯盒掉咗，佢執番個飯盒，搵返隻戒指出嚟，我好surprise 冇諗過個飯盒會有隻戒指，所以應承咗佢。佢啲親戚係印尼華僑，到時都會飛返嚟香港出席12月7號婚禮。」
同未婚夫感情幾經波折，本來去年已經plan今年復活節結婚，豈料有周刊爆料，指陳昭昭未婚夫實為已婚人士，陳昭昭有搶人老公之嫌。昭昭驚聞男友瞞婚，即開記招狠飛男友、又為個人名聲受影響而激動落淚，更揚言「若果李先生欺騙我嘅感情，我會追討李先生造成毁壞我聲譽嘅損失！」最後戲劇性復合仲結婚，依家等男友受洗做埋天主教教徒就good。睇番轉頭，昭昭形容呢個係「上帝畀好多考驗」。
昭昭話：「我哋拍拖兩年幾，經歷好多波折，上帝畀好多考驗，希望結婚之後唔好有咁多波折，平平穩穩。我先生唔係富二代大戶人家，希望平平穩穩過埋下半世，至於有冇生小朋友計劃，我都想，先生鍾意女仔，我鍾意男仔，不過男女都係上天安排，結婚後都係不設防，因為我哋天主教提倡唔避孕，順其自然，上天賜幾多就幾多。」
昭昭亦提到，自己已屬高齡產婦，所以都想盡快做媽媽。教會都有提議兩人接受婚前輔導，佢話：「其實我哋結婚之前都好多唔了解，所以結婚前接受輔導，輔導到我哋婚禮完成，之後就會簽番個證書，好似讀咗一個戀愛課程。男女相處係好深學問，拍拖同建立家庭關係，係完全係兩樣嘢，係好深嘅藝術。」對於男方曾被指瞞婚，昭昭回想：「我哋拍咗拖兩年半，喺工作中認識，雖然過往有啲唔開心嘅負面新聞，但佢對家庭觀念好重，一直好take care我同錫我。」
(蘋果日報)
