藝人肥媽丈夫Rick去年因病逝世，現已走出傷痛恢復工作。肥媽亦逐漸回復於社交網跟大家聊天的習慣。日前她如常在社交網開直播，指仍然好掛住老公，還分享日前發生的靈異事件，認爲老公從來無離開過自己。
事緣肥媽想賣老公的相機，誰知老公用開冷氣來回應不要賣走：「早兩日佢先整蠱我，咁鬼凍嘅天氣佢同我開咗部冷氣，激到我。我話『你唔係玩嘢呀老公，依家開冷氣』……」
肥媽續說：「之後發現暖水壺冇暖水，就落樓斟熱水飲。見到我個仔，同佢講我想賣咗老公部相機，因為我唔識用，佢話『媽咪你唔好賣呢啲嘢，你老公好鍾意。』我就諗唔怪得佢開冷氣啦，原來佢叫我落樓下，我唔係講鬼故呀，原來佢唔想我賣，後來先知佢最錫嘅孫女開始學影相，我都唔知。」
肥媽又指靈異事件發生不衹一次，直指覺得老公真的在自己身邊：「我搵唔到咩，就會大聲嗌，我仔話我傻，但轉頭我就搵到。有日我個保險顧問嚟我屋企，佢部電話唔知擺咗喺邊，搵咗好耐都搵唔到，之後保險顧問就話『Rick唔好玩啦』，點知一揭，發現部電話喺張紙下面。」
（綜合報道）
