暑假又到，又係唔少家長傷腦筋幫小朋友搵嘢學嘅時候，學嘢好處喺可以打發時間，仲可以幫小朋友放電，一舉幾得。周家蔚就帶兩位囝囝4歲嘅大仁(TJ)同2歲嘅竟琋(JT)去咗車路士足球學校學踼波，佢話因為天明係超級足球發燒友，所以想囝囝同自己一樣。

早前TJ兩兄弟去咗觀塘學校上堂時，除咗家蔚之外，天明媽咪都到場幫兩個孫仔撐場。家蔚話老爺(洪金寶)想大孫學高爾夫球，老公天明就想個仔似自己踢波，家蔚想囝囝打籃球，佢話:「天明踢波好叻仲好搏，佢係可以幫隊波攞好多分，但係成日受傷，做太太會擔心。所以想TJ畀啲專業老師訓練完之後呢，正規啲，唔好好似佢爹哋咁，當咗自己係個波咁成日畀人踢。」家蔚話第時可能會喺明星足球隊接班人，同班原來仲有陳豪嘅囝囝。

家蔚話細仔仲鍾意踢波，而且天明一定要佢學，家蔚仲話天明有時會嚟睇練波，仲會落埋場教:「如果天明係度TJ會仲努力，一來驚爹哋，二來佢好想做到畀爹哋睇佢可以做到。」家蔚話細仔因為年紀仲細，所以暫時只可以喺場邊玩，不過佢話囝囝一夠年齡天明一定要佢返足球學校。

足球學校嘅教練Q Sir曾經喺前香港足球隊隊員，又擔任過前甲組晨曦足球隊仲喺隊長，話會先訓練TJ兩兄弟盤、停、射嘅技巧，佢話:「小朋友集中力較差，要比較有耐性，清楚畀佢哋知道做乜。」Q Sir話學校每個月都要向英國車路士球會匯報，仲會介紹出色嘅學員到英國試腳，佢話:「好似林樂勤Johnny仔都係由細係度學波，之前佢同英甲球會簽咗約做學徒，o依家加入咗香港飛馬打中場。」

(蘋果日報)