【張致恒被質疑無錢仲養狗】佗第二胎太太雯雯谷氣回應

藝人張致恒（Steven）去年因桃色風波導致形象插水，演藝工作接近停工，事件至今一直努力找工作以養家。據知他去年底曾到酒店做廚房散工，近日疫情關係，再轉行兼職做經紀。

最近有網民留意到Steven和老婆歐燕雯（雯雯）家中有大有小要養之外，更有養三隻哥基犬，日常開支自然增加，馬上質疑Steven「無錢仲養狗！」

最近大肚老婆雯雯為老公澄清指家中三隻狗是她婚前養的，而且已養了7年，並非婚後先養，更強調唔會棄養寵物：

「其實3隻狗我已經養咗7年，亦唔係結婚之後先養，所以（冇錢點解仲要養狗呢啲說話），其實唔適合放喺我老公身上。我對於我嘅寵物我係好執着，只要我生完bb有能力，我一定可以照顧番佢哋，我好想講我係唔會放棄佢哋，由一開始你選擇得照顧佢哋，你就有責任照顧佢哋到老，而唔係自己有問題就第一時間去諗放棄佢哋，就係因為有太多自私嘅人 因為自己呢一刻發生嘅事 而去犧牲自己嘅寵物 世界先有咁多被遺棄嘅動物。其實我覺得有問題有難題 咪諗辦法解決囉，剩係識諗去放棄啲乜野 唔係一個解決辦法！要動物去為你犧牲 會唔會顯得人類太冇用！」