曾經喺周星馳主演電影《九品芝麻官》飾演尚書大人嘅資深配音員盧雄，近年因為糖尿病而減少幕前及配音工作，現年70歲嘅盧雄，近日接受港台節目《守下留情》主持劉偉恒同梁禮勤專訪，大談昔日配音軼事。節目官網更上載咗一張盧雄近照，見佢比往時足足瘦咗一個碼，但精神尚算不俗。
有周刊噚日打電話俾盧雄，佢表示呢次電台訪問係好早之前嘅錄音，問佢可有冇瘦咗50、60磅？盧雄說：「有呀。」佢承認受糖尿病困擾，由於身體狀況欠佳，暫時不便再接受訪問。
在《守下留情》訪問中，講到配音配得最多藝人，盧雄話：「配得最多係成奎安（大儍）。」之後盧雄重即刻扮大儍把惡聲話：「乜嘢事。」講到配音工作，盧雄話：「我哋嗰陣配音，係唔俾人知我哋配佢㗎，要做到我配曹查理，我就用呢把聲，成奎安我就用呢個聲，何家駒就用呢個聲。」盧雄之後又即時再扮大儍、曹查理把聲，講到扮何家駒，盧雄話：「佢把聲冇乜特別，但對方啲戲帶住我咁去。通常佢好多戲係三級片。」
盧雄成日為電影配音，但原來佢已經30年冇入戲院睇戲，因為睇得太多，而自己配音嘅戲，因為配音時已睇晒，所以唔會再睇，佢話：「我又拍戲又配音，已經完全冇代入感。你話點樣驚嘅戲，有鬼出現，呢度後面成班人吖嘛，啲鬼出現我都知係特技啦，差唔多點樣做我都知啦，咁我睇嚟做乜啫？完全冇代入感。o依家啲劇集我久唔久就會睇嘅。」
主持又問佢會唔會聽得唔舒服，盧雄話：「肯定係，所以點解導致我唔多睇呢，就係有呢個問題，除咗佢哋唔對嘴，佢哋啲語氣係唔得，唔係我自己認叻，我哋嗰輩要求高，你睇番啲港產片，真係好似嗰個人講嘢。我哋嗰陣第一要求自己要好，競爭好緊，你一定要比啲功夫比領班、導演睇，人哋咪會多用你囉，我就要自己upgrade自己啦，自己點樣練、點樣配得好啲，曹查理我直頭要講到好似曹查理講咁。」
(蘋果日報)
