新冠肺炎肆虐香港，大家哪兒都沒得去，唯有可以做的就變相是走上山逛逛，但豈料現已成了一項熱潮，令山上的人還多過旺角，相繼而言垃圾亦隨之變多。
行山郊遊永遠都不會是一件壞事，但仍然有很多無公德心的人行山亂扔垃圾，而今早歌手陳健安(on仔)就聯同一班志同道合的好朋友上獅子山執垃圾，而他之後就把這個經歷紀錄放上社交網，奉勸各位行山時記得帶走垃圾。
On仔寫道：
「今日第一次行山執垃圾之後，我覺得自己好污糟。
事緣係咁，
Van：「喂，不如行山執垃圾？」
我：「好呀。」
就係咁，Van就負責去統籌，例如揀路線，就要諗吓大家嘅能力，因為一行十幾人，又唔知大家有無行山經驗等等，又例如準備gear，買垃圾袋、夾夾、手套等等。
好記得行到20分鐘左右，到第一個point，有舊大石，大家可以休息一下，然後向下一睇，嘩，咁快打大佬？心入面開始盤算，真係執？然後又諗，越無人行入去就更加要走入去執，總要有人去執，況且今日目標清晰，唔係嚟嘆風景。
冇諗過大半個人咁高嘅垃圾袋咁快就滿左七成，然後又開始諗，執到幾時？「個袋滿哂咪走囉。」先廿分鐘，咁快就7成，預計仲有三粒鐘行，負重十幾磅咁行，好辛苦喎。
然後就將垃圾平均分開，每人都拎啲，好在人多，而大家都好明白事理。
行左四個幾鐘左右，接近尾聲，喺沙田坳落山途中見到一個斜坡下面有大量垃圾，我同魚佬估計過有路行落去，諗住盡執，到真係行埋去，發現好污糟，又有好多飛飛，確定我哋自己無眼罩，唔夠gear，就惟有放棄。
真係尾聲喇，大家負重幾個鐘都好攰，問題又嚟，要搵垃圾站，行左差唔多半個鐘先搵到，搞掂，亦唔該垃圾站姐姐咁啱開門俾我哋掉垃圾。
最後我覺得自己從頭頂到腳趾尾都好污糟，好想返屋企即刻沖涼，又唔想搭任何交通，因為覺得自己污糟，怕整污糟人哋㗎車，乜都怕。
講咁多都係希望大家理解多啲每個崗位面對嘅困難同心理關口，互相尊重之外，行為上都有所改變，例如有啲膠樽係出現喺危險斜坡上面，清潔者就會因為我亂拋，而要面對呢個跌落山嘅風險。
最後，「請自行帶走垃圾」#初登獅子山#大自然下人人平等。」
雖然，總會有熱心人幫助大眾去執垃圾，但其實把自己的垃圾扔掉皆為個人的本分和公德，要保護好香港僅餘的自然美景，人人皆有責。
(綜合報導)
