去年，因黃心穎偷食而要重拍、由湯洛雯頂上的無綫新劇《法證先鋒4》，不但成功取得內地批文，劇集更會在2月17日正式播出。波折重重，如今《法4》播映有期，監製梅小青終於都能夠鬆一口氣，而《法4》其實更是其創作生涯的終章，梅小青稱這是她的退休之作。
在超過四十年的創作生涯，由助理編導至現在身為無綫戲劇製作總監，梅小青宣布退休，其實全因為兒子劉鎮然（Alfred）。
見Alfred如此緊張要媽媽從高位上退下來是有原因的，其實是因為在過去兩年，見母親梅小青因腦血管栓塞，徘徊生死一線間，故懇求她一定要辭職。
梅小青說：「2018年喺橫店拍《宮心計2之深宮計》時經常耳鳴，又試過喺公司暈低幾次，喺橫店拍完返嚟之後，睇咗幾個醫生都搵唔到原因，睇咗個名醫先知係左腦腦血管栓塞，塞咗95%，話要做手術，萬一中風，右邊身會癱瘓。當時我都未識驚，因為《深》要趕住送檢，諗住剪埋《深》啲片先去做。」
直至2019年2月，梅小青接受手術，豈料又是另一場驚險的開始。她說：「手術後，醫生話我知，話做手術時發現塞嘅位，喺腦血管轉彎位，增加手術嘅難度，所以即刻安排急救措施，萬一手術失敗，要喺半分鐘內同我急救。呢個時候我先識驚，真係喺鬼門關行咗一轉。」
由做檢查到手術，Alfred全程陪着梅小青，照顧入微，寸步不離，梅小青說：「因為個仔陪住成個過程，知道好危險，所以下令要我退休。由做完手術至今，呢一年過度期冇事，其實個天已經畀咗兩次機會我，我之前都試過大病一場，加埋今次，我覺得自己真係好好彩，要好好珍惜。」
梅小青自言向來做事追求完美，對自己要求愈來愈高，重返無綫後打造的兩部作品《宮心計2之深宮計》及《法證先鋒4》，效果完美，已感心滿意足，她說：「返嚟TVB，我好感激杜之克（無綫副總經理）同李寶安（無綫行政總裁）嘅大力支持，令我工作更得心應手。雖然離開呢個崗位，係好唔捨得，但真係係時候要過一啲自己想過嘅生活，例如做義工，同埋湊一對孫，享受弄孫樂。」
雖然，不能在站在前線創作，但相信創作之魂永不死的！在這個時勢，就當然以身體行先，要有健康才可以做更多的事，謝謝你。
(綜合報導)
