歌手湯寶如在九龍城舊區留下很多印記，對已成歷史的啟德機場記憶猶新。
想起一架架飛近民居準備降落的飛機，畫面雖然恐怖，但也為香港這個獨一無二的特色機場感到自豪，她至今都懷念飛過頭頂的飛機降落聲音，見證住它的變遷，勾起一幕幕回憶。
90年代歌手湯寶如最近自資製作新歌《獨愛》，安坐在唱片公司旗下位於九龍城的卡拉OK受訪，令湯記勾起不少回憶，她說：「我見證到呢度嘅轉變。」
「香港啲機師真係好勁揪，我仲記得飛機準備降落時，真係好接近民居，稍為偏差少少，剷落民居就玩完，每次降落近到你可以見到屋入面啲人做緊乜嘢，你諗幾恐怖，但嗰陣時又冇諗過啲飛機會唔會跌落嚟，知道啟德機場要搬仲話唔捨得。」
當時啟德機場，幾乎每五分鐘就有一班飛機升降，她笑說：「嗰陣時啟德邊有咁多個櫃位check in，接機大堂邊有依家個機場咁大，同TVB搭景差唔多咁細，但我都好自豪啟德呢個機場，機師又犀利，航空管制又做得好，喺全世界唔排第一都排第二，我都好懷念喺頭頂飛過嘅飛機聲。」
赤鱲角機場在1998年正式落成，取代舊有啟德機場，湯記說：「搬係應該嘅，雖然嗰時知道機場要搬入赤鱲角，覺得好遠，仲話要搭成粒鐘車，啟德真係好方便，半粒鐘就瀡到去，但睇番轉頭其他國家嘅機場，往往由巿區要搭差不多兩個小時先到，機場附近大部分都好似荒山一樣。但我哋唔係，機場同民居咁近，時代變遷嘛，機場（搬）係應該嘅。」
當年湯記常到九龍城還有一個原因，就是同公司的草蜢正正住在該區，她說：「阿蜢三個係一齊住，尤其宣傳《熱力節拍WOU BOM BA》嗰時，我哋成班阿恩（黎瑞恩）、小慧（劉小慧）同草蜢好friend，成日上去玩。」
她覺得九龍城的轉變不是太大，她說：「呢度係舊區，冇咗個啟德機場啫，佢個歷史變遷唔係太多，好多舊有嘅建築物都喺度，好似啲唐樓依然存在，不過就豐富咗，多咗新食肆。」即使現在湯記都經常揸車過來食飯，好似打邊爐、泰國菜、越南菜，她說：「個街巿都幾好行，呢度啲生果都唔差，我成日嚟訂花、訂生果籃。」
(on.cc 東網)
