48歲張可頤近排忙於大陸接拍戚其義監製嘅劇集，今日特別向劇組請假返港，以代言人身份到尖沙嘴出席美容儀器記招，今次套劇會先拍第一季70集，之後再拍，佢話：「劇中角色需要由廿幾歲演到五十幾歲，係幾大挑戰，所以耐不耐要返香港造機美容。」佢承認女人凍齡係好緊要，尤其有時跟同年齡人比較，冇保養係會差一點，佢話凍齡心得除咗注意飲食休息，最重要係心情好。
講到會否接受微調，佢本身唔抗拒，尤其年青女仔接受後能夠增加自信心係好事，始終科技已經進步，不過可頤就話自己純尚自然，問到如果要微調想做邊個部位？佢話：「身材，三點式啲位，唔係要大，係想結實啲，夠用就得。」港姐出身嘅可頤，被問到近日港姐面試出現間尺鼻同佛地魔，佢就話冇留意，兼唔係睇住對方長大難以給予意見，而且審美眼光人人不同，反而佢覺得有自己個性更緊要，個個同一個樣，咁樣唔會令人留下印象。
(蘋果日報)
