屬猴的吳若希（Jinny）一向迷信，因為娛樂圈屬偏門行業，她覺得運氣比努力更重要，每年都會到師傅的佛堂供奉。踏入庚子鼠年，她自爆幾個師傅都叮囑她注意「夫妻宮」，她笑說：「師傅話『今年對你老公好啲啦！你都係脾氣大㗎啦，兩公婆之間遷就吓』！」
Jinny公司老闆何哲圖的師傅甚至建議她對老公要有盲目的崇拜，叫她：「今年你要對先生非常之好，就算你先生話月亮係方形，你都要話係。」
問到夫妻宮問題對她影響有幾大？她說：「話有拗撬，算係大拗撬，可能真係會婚變，師傅話係我頂唔順想走，如果我唔離婚就冇嘢㗎喇，所以今年我會小心啲，希望喺夫妻相處上唔好對小事咁執着。」她笑言主持《姊妹淘》好着數，因同場總有師傅指點迷津環節…
她說：「有個塔羅師傅話我如果揀離婚路，我會好差，如果繼續一齊，就會愈嚟愈好，夫妻感情會好和睦，我知成日講離婚唔好，所以會用呢樣提醒自己。」她相信每對夫婦相處生活間一定會有磨擦，並以爺爺嫲嫲為例：「佢哋打打鬧鬧，有啲似我依家同我先生相處，或者一個願捱一個願打果種相處模式，但佢哋對住咗六十幾年，都可以相處得咁好，我有咁好嘅人辦喺度，我都可以做得到。」
Jinny承認對住老公脾氣好大，老公都不解問過她：「你對住出面成日笑口噬噬，點解一對住我就忟憎。」她相信是自己緊張老公，想老公各方面都再做得好，笑說：「佢都有講我唔緊張佢嘅話就唔會着緊啦！」她指老公Alex得知問題出在她身上，即保持他一貫少說話作風，笑言：「我老公呢樣係我最欣賞，佢知我發脾氣時純粹為咗發脾氣。」坦言老公就似父母已經是屋企人感覺，關係是斬不斷。
（綜合報道）
