【以結婚為目標】唔怕步盈盈後塵 洪永城自爆2021年收樓準備同女友同居

洪永城現身馬場，直言會下注數百測試運氣，又自爆求學期曾跟洪爸爸下注，運氣不算太差，笑言「好人有好報」。

談到昨晚倒數，他透露：「同女友去咗赤柱朋友屋企玩，我飲咗幾杯。（新年願望係結婚？）我有幾個目標，包括會同女友去跑馬拉松，計劃緊去平壤，咁樣幾好吖，可以邊跑邊欣賞城市。（跑完求婚？）佢好難追喎，跑得快過我，我要加倍努力。」

洪永城又大方表示今年計劃同居，當被問到會否擔心步馮盈盈後塵，甫同居即「出事」，他坦言：「呢啲可能係每對情侶必經嘅階段，要接受對方嘅優點同缺點，match唔到都要勇敢面對。（買樓築愛巢？）我2021年收樓。（即係出年諗結婚？）朝着呢個目標同方向，希望可以有好消息同大家分享。」