大美人李嘉欣婚後專注家庭，享受湊仔生活，近年已逐漸淡出幕前，但間中亦有出席公開活動。最近她復出幕前，為内地節目《演技派》擔任嘉賓，不知道會否缺少時間陪伴家人？
她就回答只是沒法與家人度中秋節，透露只是拍了4日，沒有太多時間睡覺：「因為我個妝同頭飾成日轉，用好多時間，而且拍攝好緊密要通宵拍，4日拍咗8日嘅嘢，4日瞓咗6個鐘，都真係好唔慣。（本身係咪因為拍四日先接？會唔會覺得畀人賣豬仔？）唔知呢？佢哋好專業。」
對於今次有傳酬勞五千萬，嘉欣說：「誇張咗，但滿意。（拍完後有冇戲癮再復出？）咁又冇，但今次係一個好好嘅經驗，第日有好嘅戲本都可以考慮吓，唔係完全唔做任何嘢。」
昨晚，她與老公許晉亨及仔仔許建彤（Jayden）出席聖約翰座堂聖誕音樂會，今次是Jayden出世以來嘉欣第一次公開帶仔仔出席公開活動，一家三口任影唔嬲。
去年Jayden臨時為是次活動表演朗讀，今年主動參與，嘉欣說：「佢睇兩、三次就記得，記憶力幾好，佢讀書成績過得去，活躍得嚟好正面，有啲嘢做得唔夠好，下次會做好啲。」Jayden面對眾多鏡頭表現大方超淡定，媽咪說是他主動要求全家人一齊亮相。
Jayden面對鏡頭十分淡定，被指有潛質做星二代，但嘉欣卻不認同說：「佢有潛質做生意。（想佢從商？）想佢做佢鍾意嘅事，佢仲細未知想做咩，佢依家鍾意煮嘢食，睇書，又鍾意研究歷史，打高爾夫球，平時都有同爹哋一齊打。」看來Jayden興趣廣泛，而且性格好好，繼承爸爸業務指日可待。
（綜合報道）
