孫慧雪（阿雪）於16年與圈外有米男友Edwin結婚，她於17年8月更為對方生了兒子Riley，囝囝現已兩歲多，阿雪忙於湊仔，又忙於自己事業，所以打理成頭家當然少不了要有傭工幫輕家務。
阿雪昨晚在社交網發文，上載了一張財務公司追債信，原來她的工人姐姐突然辭工，表面話返鄉下，原來內情是避債為實。
「我工人姐姐突然請辭，話要返鄉下，我想請佢幫多幾日手都唔肯，喺佢一走咗之後，追債電話就打嚟，又收恐嚇信，即刻明晒點解對佢咁好都要走，我之前仲猛咁諗，係咪辛苦咗佢！佢之前話有困難，我哋仲借咗筆錢俾佢！唉！佢明知我哋屋企有小朋友都咁樣，真係好過份～可以點解決」。
阿雪的發文一出，不少網民都有留言表示曾遇過工人欠債走路，叫她主動去聯絡入境處備案，亦要通知財務公司此人已離職，而有網民問她工人是否僱傭中心請回來，她即吐苦水：「係呀！仲要interview嗰陣話肯照顧小朋友，請咗返來之後話唔會照顧小朋友！」
（綜合報道）
