今年7月她宣佈懷孕，當時她透露BB預產期為10月底11月頭。昨晚她在社交網宣佈BB出世啦，並貼了一家三口的溫馨合照。相中的她仍有孕婦肥，但精神不錯，初為人母的她笑得燦爛，並透露BB是男生，重6.5磅，並打算餵母乳。
陳小娟除了宣佈當媽媽的喜訊，她還留言表示將於明年復工，她留言寫︰「新作品Mini Ma已經而世喇~~~P.S.努力做乳牛中，但都要賺尿片錢，歡迎一切工作邀約，2020年頭復工。」其實她懷孕期時，並沒有完全停下工作，早前她曾表示，懷孕期會着手寫書。
她向《蘋果日報》透露順利誕下B仔：「係男仔，出世6.5磅，順產。陣痛5小時，因胎位唔理想，仲以為最後可能痛12小時再開刀食全餐，幸運地BB最後識自己轉返正，最後用咗15分鐘就生咗出嚟。陣痛的確好痛，而且係對意志力好大考驗，因為產婦自己係預計唔到要痛幾耐。每次陣痛都抓實老公隻手，然後同自己講呢種痛始終係會完。不過講真一開頭都真係流咗啲眼淚，因為真係痛！」
談到當了媽媽的感受，她說︰「做媽媽覺得真係好大改變，唔再係二人世界，唔再可以咁隨心地吃喝玩樂，甚至工作同休息模式都必須改變，但係一見到BB，就覺得值得。抱起佢覺得好幸福，覺得佢好脆弱好需要保護佢同埋要俾好多愛佢。」
而她表示明年復工，往後她的工作安排會如何？她說︰「好彩做呢行都好flexible，並唔係要日日返office嘅工作。所以都係會老公同家人盡量配合同分擔。我諗從事創作嘅工作，自律真係好緊要，每日要設定留幾多時間去寫嘢，幾多時間湊仔，就要堅持做到。希望可以繼續帶大大小小嘅影視作品俾各位觀眾！」
陳小娟的大肚寫真好有藝術感，果然是做電影的！
陳小娟首次執導的電影《淪落人》今年4月上映，當時她已懷有身孕，但她仍落力宣傳。該片不單止令黃秋生再封金像獎影帝，就連演菲傭的姬素.孔尚治（Crisel Consunji）獲得金像「最佳新演員」，至於陳小娟亦獲得多個新導演獎，而該片錄得1,984萬票房。
（綜合報道 / appledaily）
