黃澤鋒和太太陳麗麗昨日在尖沙嘴為囡囡「小黃妃」黃熙恩舉行百日宴，筵開五十多席，不少圈中好友到賀。宴會開始前澤鋒和太太抱着囡囡會見傳媒，並替小黃妃即場舉行剪胎毛儀式，由黃澤鋒操第一刀，剪下部分頭髮用來製作毛筆。
一路熟睡的小黃妃在媽媽懷內一起接受訪問，榮升爸爸媽媽3個多月，他們表示已開始習慣，新手爸爸形容女兒扭計時似紅色炸彈：「今早她被樓上裝修聲嘈醒，之後發忟憎大喊。平日她發脾氣就會谷到面紅紅，大喊完突然停到倦極入睡，睡醒再喊過。見到沒有人在身邊喊細聲，有人就喊大聲，有演戲潛質。」兩公婆又指BB現時重11磅多，體重屬正常，可能吸收良好，小腿肥到似米芝蓮。
陳麗麗表示囡囡現在長得肥肥白白：「有成11磅，醫生話應該係我陀佢嘅時候啲維他命畀佢吸收晒。」然而，因為長期抱B導致媽媽手部有些少勞損，黃澤鋒說：「醫生話要食多啲豬皮吸收膠質，同埋而家叫做戒夜奶就好好多，之前3個鐘頭食一次奶，大家都好攰。」
同時黃澤鋒又大讚女兒腳頭好：「托賴佢出世後我都有唔少工作，冇辦法囡囡係生於亂世，我自己67年暴動出世，又係生於亂世，希望囡囡第時會健康堅強。」講到今晚宴會規模不少，黃澤鋒說：「 其實本身諗住呢排亂世，預咗圍數要Cut一半，但結果咁多朋友都好畀面嚟，好多謝佢哋。」
陳麗麗表示，知道現在港鐵將會晚上10點收車：「我哋今晚宴會會準時八點開始，早啲食完大家可以早啲返屋企，好彩仲有巴士，我諗路面交通都OK嘅。」 黃澤鋒又稱：「我同太太加埋百幾歲，而家仲有個3個月嘅女，上天對我哋已經好好，我記得同太太結婚時係比較小型宴會，今日有咁多朋友嚟，希望喺最唔開心嘅時候畀大家開心一次。」
（綜合報道）
