政府公布咗2018年嘅公眾假期，唔少打工仔最關心嘅，莫過於點樣可以打造悠「長」假期。如果係五天工作周、放「銀行假」嘅打工仔，下年有3次機會可以請3、4天假就放超過10天假，分別係復活節清明節、中秋國慶同埋聖誕新年喇。
下年嘅復活節假期分別係3月30日（星期五）、3月31日（星期六）同4月2日（星期一），而清明節就係4月5日（星期四），換言之，只需要喺4月3、4月4同4月6日攞3天假，就可以由3月30日放到4月8日，足足10天！
另外就係9、10月嘅中秋同國慶喇。下年中秋節翌日嘅假期係9月25日（星期二），連埋之後星期一嘅國慶假，只需要請4天假，就可以放10天假。
最後就係年尾嘅聖誕連第二年新年喇，由12月22日起計到翌年嘅1月1日，扣走中間嘅12月25日同埋26日，各位打工仔就可以請4天放11天喇！
除左呢3次長假機會，其中都仲有幾次假期可以請一、兩天假就去到短途旅行，例如下年勞動節就係星期二，請星期一就可以放4天；又例如下年10月17日嘅重陽節係星期三，攞2天就可以放5天。
2018年公眾假期如下：
元旦／一月一日／星期一
農曆年初一／二月十六日／星期五
農曆年初二／二月十七日／星期六
農曆年初四／二月十九日／星期一
耶穌受難節／三月三十日／星期五
耶穌受難節翌日／三月三十一日／星期六
復活節星期一／四月二日／星期一
清明節／四月五日／星期四
勞動節／五月一日／星期二
佛誕／五月二十二日／星期二
端午節／六月十八日／星期一
香港特別行政區成立紀念日翌日／七月二日／星期一
中秋節翌日／九月二十五日／星期二
國慶日／十月一日／星期一
重陽節 ／十月十七日／星期三
聖誕節 ／十二月二十五日／星期二
聖誕節後第一個周日／十二月二十六日／星期三
（明報）
