【張致恆入紙結婚】稱：希望TWINS原諒 會好好對老婆

藝人張致恒（Steven）今年7月宣布婚訊，昨晚未婚妻歐燕雯（雯雯）在社交網上載了一對結婚戒指的相片，倒數正式做張太。

今早約10時50分，身穿禮服的Steven抱住囝囝，與着白色簡約禮服雯雯乘白色座駕到達律師樓大廈外，跟隨尾後有一名家傭幫手拎住BB車及兩個裝飾汽球，一家三口落車應傳媒要求合照，面露微笑的Steven笑話：「囝囝發緊呆，仲未瞓醒。」但準張太卻面有難色、面燶燶，更拒絕脫下灰色外套合照，接着他們直入大廈上樓去律師樓進行簽字儀式。

指事情令多人受困擾，自己亦受到好多攻擊，一家三口都被痛罵，Steven洗心革面說：「好想用自己本身去證明會做番好，為屋企、家庭努力，希望大家畀多次機會我，喺度同大家道歉，困擾到大家唔好意思，之後會好好咁錫老婆同BB，畀個好嘅成長環境佢，對老婆一心一意。」問雯雯聽到老公此番「愛的宣言」有甚麼應受？她只簡單笑話：「多謝。」問到之後會百分百信任老公？她點頭回應：「係。」Steven幫話：「佢都好緊張，一生人第一次，佢都瞓唔着。」

他指今日只通知親友：「可能會用一年時間儲錢，出年9月2日再擺酒。（Kenny有祝福你？）在心中，都唔想造成佢嘅困擾。（之前Twins Unfollow咗你IG，依家關係係？）明白嘅，識咗咁多年，嬲都明白，都想同佢哋講對唔住，令到佢哋嬲、唔開心，希望佢哋會原諒我。（會修補關係？）遲啲過一段時間。」。