資深演員夏萍因病離世，享年81歲。
好友胡楓自50年代於粵語片年代開始與她相識超過半世紀，對於好友辭世，胡楓接受電話訪問表示：「啱啱先知（夏萍死訊），梗係唔開心啦。知佢病咗好耐，但自從佢入老人院住後大家少咗聯絡，我都唔知去邊探佢。（印象中有乜相處點滴？）同佢拍戲好好玩，佢係男仔頭一名，講笑呀乜都得。（問候佢家人？）我同佢屋企人唔熟，但出殯點都會去鞠躬，送佢最後一程。」
另外，藝人曹永廉與前輩夏萍曾多次合作拍戲，對於對方辭世，阿廉回應：「年前我同佢啦、吳啟華等合作拍攝《純熟意外》，當時佢已經唔係好睇到劇本，不過只要讀一次對白畀佢聽，佢已經記到同做到，同佢合作好開心，係一個好好爽嘅人。」
梁競徽則說：「同夏萍姐拍過好多套劇、演個佢個孫，有時會載佢返工、接埋佢收工，聽到消息覺得好突然，希望佢安息，觀眾朋友會永遠記得佢。」
與夏萍姐合作電影《歲月神偷》飾演兩嫲孫的藝人李治廷，在社交網上留言悼念：「您永遠是我們歲月神偷裏最有愛的奶奶！我會想念偶爾飲茶偶遇您所感受到的溫暖。想念」
而夏萍最後一套演出作品，是與陳展鵬等合拍電視劇《城寨英雄》。當時拍檔之一的劉佩玥回覆記者表示：「好感恩及榮幸同佢合作過。佢好可愛，記得我哋有日開廠連續拍好幾場，佢仲好精靈同劇組有講有笑。」
（on.cc）
