尋晚天后容祖兒的紅館騷《PRETTY CRAZY JOEY YUNG CONCERT TOUR》，請來「歌神」嘉賓張學友，身穿黑色西裝套裝的學友於祖兒唱出《這麽近那麽遠》時現身，「歌神」、「歌后」對唱，令全場high爆！
唱完後，祖兒興奮不停反問自己是否發夢，學友笑說：「我要多謝祖兒就真，呢首歌係我寫，佢唱就幫我增加版稅，其實我哋差一輩。」祖兒接話：「邊度係？我讀中學就聽你嘅歌！你啲歌冇年齡界限。」搞到學友大笑話祖兒好畀面：「通常啲人都會話係小學聽我唱歌、或者父母聽我嘅歌大。咁你唱多啲我嘅歌，下次我再嚟做你演唱會嘉賓！」
之後祖兒又自爆曾揸車撞花學友的座駕，認真大膽！學友笑笑口話記得這件事，又講起英皇老闆楊受成在祖兒入行初期介紹俾佢識，但一直冇機會合作：「佢依家已經係人哋嘅偶像，你啲Fans真係識揀！我都係一個好挑剔嘅人，唔容易讚人，但我覺得祖兒係現今樂壇具備晒所有條件嘅歌手，佢對唱歌好有熱誠、謙虛、努力，佢會挑剔自己，又敢於挑戰。睇佢以前嘅訪問，佢自認跳舞硬手硬腳，好似講緊我咁，我跳舞都似一舊木，依家佢跳舞，大家對眼係離唔開佢，佢係我嘅後輩，佢好值得佢嘅後輩向佢學習。」全場Fans聽到即刻拍爛手掌！
祖兒仲話20週年演唱會可以出動學友做嘉賓，等同收到20年黎最大份花紅，學友聞言即向坐在觀眾席的楊受成「追數」，講笑話：「咁你要出花紅畀我喇！」講到祖兒幾時邀請到學友做嘉賓，學友就話喺喺健身室：「佢走埋嚟問『我可唔可以⋯？』，我就一口應承話『得啦！』，祝你演唱會成功！」接下來二人再合唱多一首學友的金曲《真情流露》，祖兒賣口乖話：「企學友哥哥隔籬好安心，似食咗靜心。」全場大笑！
去到演唱會尾聲，由於演唱會遲開騷，祖兒唯有cut歌，不過她特別點唱《華麗邂逅》，以悼念已故好友盧凱彤：「呢首歌想送畀遠方嘅朋友，上年嘅今日佢離開咗我哋，希望大家鍾意我揀嘅呢首歌。」
唱完後，她本身想落台換衫，但有一番說話擔心再上台先講會有Fans要趕車離場，所以就說：「今晚真係好抱歉！之前因為打風，加上個台嘅複雜程度，遠超之前嘅演唱會，第一晚就出現咗啲唔想見到啲事，好多謝大家陪我做Full Dress Rehearsal，我好感激、珍惜，大家咁有義氣，我啱啱喺台下決定下星期一，8月12號我本來係放假，今晚在場嘅朋友，我想邀請大家再嚟紅館，睇一個我為你哋精心準備嘅Pretty Crazy演唱會好唔好呀？」全場尖叫聲四起，聲音震懾整個紅館！祖兒接話：「大家記住唔好掉咗張飛，否則入唔到場，睇過覺得夠，就畀飛姨媽睇，咁大家喺呢度，不見不散！」
呢位天后，認真唔話得！
