最新一集《後生仔傾吓偈》以結婚和婚禮為題，一眾後生仔講到「恐婚症」，有人提出同居會發現另一半好多缺點。最近同男友寶寶同居嘅馮盈盈，亦即時舉手表示非常有感受。「真係出事，好想叫媽媽，原來要做家務真係好辛苦，以前喺自己屋企有媽媽同工人姐姐，但而家自己做家務。發現係輪迴地獄，今晚好努力做完， 聽晚又要繼續做，後晚又要做，永遠都唔會結束。」仲話爸爸由細到大都話唔好淨喺顧住拍拖，要同居佐先得。
而麥明詩聽到呢度，即刻話：「佢做家務做到好多嘢都無時間做。」一向無避諱嘅馮盈盈就話以為同居可以過下二人世界，點知而家每日就係洗衫、吸塵、洗衫無限loop。「做到好攰，一上床諗住傾吓偈，點知寶寶已經瞓咗。」唔知大家係咪都好有同感呢？
而身為嘉賓嘅何雁詩自爆早在5歲時已經被求過婚，而對象更係同自己同時同月同日生嘅男仔，就連戒指都收埋。咁對男友鄭俊弘嚟講，會唔會好有威脅性呀？不過何雁詩都醒目，最後補一句「而家無聯絡啦」，並突然放閃「而家都好好，而家仲好」。當麥明詩追問幾時可以結婚時，何雁詩先係笑一笑咁話「我同鄭生定我同呢個（指5歲求婚對象)」之後再話「隨時啦」，睇嚟都好事近喇。
