藝人羅霖近日去咗尖沙咀出席晚宴，提到前夫劉坤銘近日爆出有新戀情，女方係現職香港基督教女青年會總幹事楊建霞（Yvonne），有指兩人交往已一段日子，但劉坤銘稱尚未正式介紹女友俾三個仔認識。
羅霖踢爆話自己知道咗好耐：「係啲仔仔話畀我聽，啲仔仔都同過佢哋去過旅行，我個人比較直，有嗰句講嗰句，我唔會好似人哋咁識包裝。」唔知暗串緊邊個呢？
提到有傳佢哋有意結婚，羅霖大方祝福：「驚講咗唔係咁適合，總之佢哋一齊咗一段時間，都同得我啲仔仔去旅行，據我所知佢哋都好多年喇，當然希望佢哋開花結果，祝福佢哋。」
被問到仔仔情緒有無唔開心，佢話：「依家已經好啲，因為都已經係幾年嘅事，初初有，依家冇，我啲仔仔都大，我又開解佢哋，慢慢接受。（依家相處得幾好？）呢樣就唔講得，反而我啲仔成日叫我搵番個伴，都好感動三個仔咁錫我，等佢哋大學畢業先再考慮。（介唔介意畀人將你同前夫女友比較？）唔介意，每個人都有優點、缺點，佢都唔係娛樂圈嘅人，所以冇得比較。」
前排羅霖喺澳門被拍得身邊有男士出現，佢解釋係生意朋友：「朋友都驚咗同我出去食飯，食飯都叫我搵個隱蔽啲嘅地方。」
（on.cc）
