唔知大家對飛機上嘅知識又知幾多呢？之前就有空中服務員大爆料，飛機上要注意咩小細節，有咩唔應該做，一齊嚟睇下以下呢5點啦！
1 – 機上最好飲用樽裝水
原來沖咖啡嘅水，係同沖廁所嘅水一樣，來自同一條水管！空中服務員仲話通常都無人會清洗水管，真係可以想像到究竟有幾污糟，所以佢哋建議如果要飲嘢，最好都係飲返樽裝水或者有包裝嘅飲品！以後搭飛機都係唔好飲咖啡、熱茶之類啦！
2 – 機上最污糟嘅地方係地板
可能好多人都認為機上最污糟會係枕頭、廁所之類，但原來最污糟係地板！有空少大爆唔少乘客鍾意赤腳喺飛機度走嚟走去，特別係去廁所嘅時候，編輯都好費解點解會有人咁做，真係諗起都覺得污糟。
3 – 空中服務員會昅女／仔
乘客登機嘅時候，一班空姐同空少就會打量旅客，會留意邊啲人特別靚仔或靚女，或者特別Sexy，仲會為佢哋評分！自問靚仔靚女嘅你，一於睇下上機後會唔會有空姐空少討論你啦！
4 – 乘客進入頭等艙
如果你唔係買頭等艙嘅機票，基本上係好難轉坐頭等艙。不過有空姐爆料，見過有乘客同空中服務員好傾得，又或者生得夠可愛，話唔定都有機會入頭等艙㗎！
5 – 應唔應該揀低糖飲品
有空姐話喺飛機上最唔鍾意倒低糖可樂，因為低糖可樂嘅氣泡好難消散，搞到一班空中服務員要等好耐先會斟滿杯可樂。有時佢哋唔想等咁耐，甚至會將成罐低糖可樂畀乘客。
唔知今次嘅機上大揭秘有冇令大家長知識呢？
（新假期）
