藝人黃澤鋒太太、52歲陳麗麗於年初宣布成功造人，一轉眼B女已經出世喇！
黃澤鋒於社交網報喜，晒出愛女腳仔相，宣布：「歡迎妳的來臨！#幸福並不是必然的 #生死一瞬間 感恩我們可以…」最後更Hasgtag「#和你一起繼續走」，令人非常感動。
高齡產婦生B時風險會特別高，之前黃澤鋒講過太太會選擇剖腹降低危險，據知喺生產過程出現嚴重問題，陳麗麗血壓不斷飆升險些中風，去到爆發妊娠毒血的臨界點，期間陳麗麗一度昏迷，幸好最後母女平安，二人其後轉到接受治療及觀察ICU，休息數日後出院，一家三口已回家。
黃澤鋒接受《蘋果日報》訪問「小黃妃上周一已出世，媽咪去到周六先出院，托賴有驚無險，兩個都平安，我最安慰。初初我陪太太入產房，想睇住小朋友出世，好開心，但太太最初半身麻醉，但腳腫藥到唔到，變咗要全身麻醉，醫生突然請我出手術室，我當時好驚，心離一離，好忐忑，唔知點講同點做，嗰半小時係我人生唔知點做，又唔可以燥，唔可以發脾氣，要冷靜，始終醫生最專業，我只有喺度等，等等等，嗰半個鐘頭好難過。」
半小時捱過，黃澤鋒續說：「之後姑娘請我入去，佢話小朋友出咗世，你入去剪臍帶，我即刻衝入去，姑娘叫我唔好望左面，因為急救緊太太，右面係小朋友，醫生話囡囡唔係好喊，我就鬧囡囡『喂，你做咩？』結果佢就喊，佢一喊就冇咩事。我咪回頭睇太太，佢正縫針，醫生話十分鐘就得，會同我搞掂太太，醫生之後解釋太太生時血壓唔降，有機會中風，做手術升得好緊要，臨界點去到妊娠毒血爆發，產婦有機會中風，唯一可以救係小朋友出世，媽咪就冇事，好好彩。我見太太唔醒，我搖醒佢，周一剖腹，周六先出院，母女產後都入咗ICU，要抖夠。」母女經過醫護人員悉心照料，身體都回復健康，昨日平安出院，一家三口回家，黃澤鋒才安心貼相報喜。
這次入院發生突發意外，母女產後入住ICU，費用超出黃澤鋒預算，他說：「最緊要佢哋冇事，錢使咗可以搵得番。」
問到囡囡情況？黃澤鋒說：「小朋友出世有6磅重，似我好多頭髮好可愛。」由一家三口相中可看到「小黃妃」的確眼仔碌碌，對鏡頭敏感度強，媽咪陳麗麗也顯得精神。黃澤鋒表示感謝太太「搵命博」為他生女，承諾要痛錫妻女：「太太搵咗表妹嚟陪月，我叫佢好好休息。」
(綜合報道 / appledaily)
