無論夫妻關係幾融洽，都仲會有啲死穴係唔掂得，一時大意講錯嘢，隨時離婚都唔出奇！
好似張晉同蔡少芬，結婚11年一直恩愛都爆，張晉試過因為講錯四個字，搞到蔡少芬嬲嬲豬，用咗好多時間先至氹得掂老婆！
呢日張晉去咗台灣宣傳新片《九龍不敗》，喺活動上自爆曾經對住蔡少芬講「老夫老妻」，結果搞到老婆好唔開心，當時出盡辦法平復對方心情，但係當時佢仲未明白呢四個字點解會有咁大殺傷力，淨係提醒自己唔好再講呢句說話。
隔咗好耐先至搞清楚，蔡少芬嬲嘅唔係年齡大小問題，係「老夫老妻」等同奉旨乜都唔使做，包括唔會再有浪漫關心，甚至乎行街都唔會拖手仔。
雖然依家有兩個小朋友要照顧，佢哋都會抽時間過吓二人世界，好似等小朋友瞓咗覺，就會匿喺廚房飲酒談吓心，唔怪得之佢哋結咗婚咁耐都可以維持初戀嘅感覺！
(on.cc)
