歌手楊千嬅同老公丁子高結婚十年，育有一子，一直都恩恩愛愛。近日千嬅就忙於世界巡迴演唱會，而作為佢嘅經理人子高亦陪伴左右。
今日子高喺網上上載一張截圖，原來近日有好多朋友轉發一段新聞畀佢，見圖中標題以英文表示「千嬅含淚指與老公婚姻完結」。
子高對此表示無奈同好笑，澄清夫妻二人關係和睦，直接否認離婚傳聞，並希望大家要過濾網上資訊嘅真確性：「網絡世界有好多我哋控制唔到嘅事，而咁啱近排又有好多事件接二連三地發生，呢啲都係我哋控制唔到嘅。而（依）家科技太發達，每個人都可以喺網絡上説話，甚至可以將一啲原有嘅訊息被攞走，所以出現咗好多唔同嘅意見及不實嘅報道，希望大家要過濾吓網上資訊嘅真確性同埋注意帳戶加密安全。」
隨後，佢再上載同千嬅頭貼頭合照，力證二人情不變。
而好友李施嬅亦留言：「除非經過當事人證實，如果唔係唔好相信一啲未證實嘅事。」
(綜合報道 / on.cc)
