台灣第一名模林志玲同日本型男AKIRA閃婚真係嚇窒好多人，呢單嘢除咗震驚兩岸三地同日本外，亦有好多人攞出嚟抽水。繼有內地傳媒財經版抽水後，台灣玄學家江嘉葉更喺呢個時候，話志玲姐姐同AKIRA有宿世姻緣，係真唔係呀？
呢位玄學家喺台灣薄有名氣，以通靈聞名，佢話佢哋前世本來就係一對夫妻，二人非常恩愛。不過，男方個性剛強又大男人，而林志玲雖然溫柔體貼，但外柔內剛，導致佢哋結婚多年後，因想法唔同又堅持己見，關係日漸行疏遠。雖然雙方仍關懷彼此 但佢哋冇人願意先放下身段打破僵局，最後人前幸福，實際上有名無實，所以今世要重修呢個課程，真係講到似層層咁噃！
大家都好關心佢哋幾時生B，江嘉葉就話林志玲的好事可能將近，仲言之鑿鑿話：「有一個嬰兒正等待投胎」仲話呢個BB會係家庭嘅潤滑劑同福星，希望佢快啲傳出好消息。
其實呢，風水命理並唔係精密科學，好多網友都話呢位玄學家咁把炮，點解唔喺佢哋宣布閃婚之前講；亦有人話佢哋千世修來共枕眠，可能真係有宿世姻緣呢！
(on.cc)
