歌手盧巧音（Candy）年前因為患上情緒病一度消失樂壇，幸得及時就醫令生活重回正軌，上月佢更舉行一連兩場演唱會，獲多位圈中好友支持。
不過呢日Candy就自爆完騷後心情落寞，有「Show後抑鬱」，仲話因為近日天氣關係，未能靠跑步紓緩心情，佢提到：「以為自己情緒病過咗，Show後抑鬱會無咁嚴重，點知維持咗over一個星期，期間瞓得麻麻有頭痛添，Show前又唔敢跑，驚會將啲記咗成個月嘅歌詞跑到跌晒出來，Show後天氣極差又無心情跑，盧巧run都有軟弱無力嘅時候。」
不過唔使擔心，Candy亦晒出一張天朗氣晴嘅天空相，指今日天氣回復晴朗：「今早一開眼睛就見到藍天，絶對係送畀我嘅一份禮物」相信佢已平復心情。另外，佢又晒一出一張路經觀塘嘅風景照，並發文表示：「小時候最愛夏天，因為可以自己一個人去找河馬阿姨，去完觀塘工業中心搗亂玩毛線，就跟表姐表妹跑到對面的游泳池玩耍，很懷念。媽媽姓甚麼？跟阿姨一樣吧。」
(on.cc)
