黃翠如到將軍澳出席宣傳活動，黃翠如與蕭正楠（Edwin）結婚一周年，早前二人秘密到峇里補辦浪漫婚禮。
翠如表示整個婚禮只有15人出席，她說：「其實我哋兩個都結咗婚，婚禮係為咗父母，每個父母都想自己個女正式嫁出去，婚禮純粹為我屋企人，我唔鍾意太過複雜，亦都唔想佢哋辛苦，去到都係盡量簡單，同埋去一個唔太遠嘅地方，地點都係我揀。」
對於婚禮最重要的環節，翠如說：「最重要係正式喺屋企人面前，爸爸拖我交畀Edwin。我本身冇喊，但見到爸爸第一次喊，阿爸好錫女，佢不嬲係一個唔出聲嘅人，見到佢喊，我自己都忍唔住，爸爸同Edwin講，我照顧得個女唔夠好，你要好好照顧佢，Edwin都忍唔住喊。」
翠如透露，蕭正楠確實好體貼，她說：「佢好照顧我，返去洗車都係洗我架車先，又每日幫我吹頭，對於承諾，佢每次都係話聽晒我話，令我最深刻。」
翠如原先想安排婚禮於去年結婚那一周，但最後推遲舉行，她說：「爸爸想喺通勝度揀日子，所以就遲咗少少，唔會再喺香港補擺喜酒，已經感覺到大家畀我哋嘅祝福。」
問到此行有否造人？翠如坦言：「未呀，今次唔係度蜜月，只係留咗5日，之後去咗日本、馬來西亞，都係逗留咗3日，蜜月Edwin話喺大埔搞。」
(appledaily)
