金燕玲早前發現患上子宮癌，要接受共6次化療療程，她之前每次完成化療後，都會現身好友蘇施黃主持的節目。
昨日她又上電台節目《大玩派》做嘉賓，接受完第5次化療的她，頭上戴住圍巾，薄施脂粉，精神不錯。
她在節目中大談生死，她說︰「我覺得人始終都要死，因為癌症死又好，唔係又好，其實都要死，係咪先。我意思唔係要自己短命，我意思係人要好好地去take care自己身體，點解食嘢小心，就係要整好自己嘅架生夠強，萬一你有病時，你先有個夠強嘅身體同佢抗。因為你身體唔夠強時，你病時你會好辛苦，你又唔夠佢嚟啦，要照顧你嘅人都會好辛苦。其實唔好到病時先點點點，平日你真係要take care自己，生活方式同食嘢呀。好似我咁我都幾小心，都會病。」
她還透露已接受完第五次化療療程，將於6月4日做最後一次化療，她分享化療後的副作用：「我依家甩晒頭髮、只淨番8條眼睫毛，成身骨痛，好擔心骨骼疏鬆，仲有肥咗，肥咗17磅，有130磅。」一向貪靚的她，指病後因容顏及體重有變而有少少抑鬱，但又覺得要積極面對，不可令朋友擔心，所以她堅持扮靚：「我會化妝、戴帽，做運動，唔開心時就搵朋友打麻雀，其實扮靚唔係為咗人哋，係為自己，自己睇到自己靚，心情都會好啲。」
她又說醫生曾估計有可能三年後癌症復發，但她不擔心：「覺得生同死係整定，我今年都65歲，3年後我都差唔多70歲啦，如果長命，但要人照顧，我覺得生不如死，或者我3年後又可以再3年啦，依家要活在當下，珍惜身邊人。」
此外，她在節目中大爆阿蘇煎牛扒難吃，她說︰「我而家唔可以食生嘢，但食牛扒點樣半生熟呢？咁阿蘇嗰日煎塊牛扒畀我，煎熟啲喇！嘩，難食到死，對唔住呀，阿蘇煎都係咁難食。」
(綜合報道)
