已有一女的幸福人妻去年宣佈再度有喜，轉眼便陀B八個月，這胎繼續懷B女，即將再為馬主老公馮柏基再添前世小情人，當然錫到燶，腹大便便的她日前一家「四」出動拍攝大肚寫真留念。
挺着巨肚的Icy穿了白紗裙，頭戴小皇冠，老公馮柏基穿了色格仔西裝，而囡囡Kyra跟媽咪一樣是白裙，Kyra還給爹哋獻花，冧爆前世情人。
黃婉曼本月底將卸貨，所以趁着有時間便一家拍照留念，問到當天拍攝花絮，黃婉曼今日接受《蘋果》電話訪問時說：「阿女一開始唔多合作，我準備咗好多靚衫畀佢，佢都唔肯換，後來見到現場好多花，佢好鍾意花嘅，我咪叫佢『不如送朵花畀爸爸』，佢就開心笑住送，於是成功影咗幾張相。」
家中是獨女的黃婉曼，自幼卻希望有兄弟姊妹，所以婚後，她已計劃生至少三名孩子，她說：「雖然我成日下巴輕輕話生三個，而家就嚟係兩個小朋友嘅媽咪，我都覺係難得同幸福嘅，呢段其間，我又同時籌備緊新嘅麵包店開張，所以比較忙，但我都會花多啲時間盡量陪大女多啲，同佢講吓古仔，教佢就嚟做姐姐，點樣去錫小baby，好多朋友教我等BB出世，要用細B名義送份見面禮畀姐姐，好等佢唔好呷醋，我仲諗緊送乜嘢。」
黃婉曼珍惜一家三口再添新成員，她續說：「好快一家三口變四口，係好值得留念，所以要一家輯影溫馨合照，等BB將來大個睇番留念，佢知道出世前，我哋係咁嘅。」
黃婉曼有過第一胎的經驗，她說：「呢胎輕鬆啲，時間過得快啲，好彩呢次冇妊娠糖尿，呢胎我特別提醒自己夠營養就OK，唔使大魚大肉，其實BB都有自己喜好，佢鍾意食菜、生果同乳酪，亦比較健康，之前六、七個月時陀得辛苦啲，BB腳仔長，我個胃成日畀佢頂住，搞到胃酸倒流，仲入過急症室，但踏入 最後呢一個月紓緩咗好多，冇咁胃痛，所以朋友都慰勞我，成日帶我出去食好啲，我都放膽食多啲，因為遲啲生完坐月，又要戒口，今胎約重咗20磅左右。」
黃婉曼的facebook日前貼出跟區永權到吳啟明的餐廳吃飯，她還大啖吃雞脾，食得好滋味。
(apple daily)
