劉小慧於14歲出道，當年以清純形象打入巿場，更有「學生情人」之稱，當年佢同湯寶如及黎瑞恩係「寶麗金小花」。
儘管劉小慧當年未去到天后級之位，但佢形象正面，憑清純可愛形象風靡萬千少男，不過喺97年嫁畀蘇志威後淡出娛樂圈。
先後誕下兩名千金君蕎同靖珺。
劉小慧婚後專心相夫教女，間唔中先會參與演藝工作，好似做吓演唱會嘉賓呀咁，但主力係做全職蘇太。
不過佢最近終於「出山」，喺Facebook開Live同網民分享各種生活小貼士！
頻頻開Live，同大家分享美食、煮餸竅門等等，講下自己嘅經驗同心得。
小慧希望可以幫到人，傳遞正能量，得到家人與好多朋友支持！
呢次佢就同大家分享一個紓緩濕疹方法，希望可以幫到受困擾嘅朋友。小慧就話呢個方法只需要用簡單食材，喺屋企都可以整到，佢已用此方法幫到不少患了濕疹的朋友。
佢先喺FB PO咗前後對比圖，留言話：「圖中對手係同一個朋友，佢用左我推介既方法，無藥性，無化學物質下，一個星期好翻好多！」
終於開估係咩法寶！原來係「蛋黃油」，又名「卵子油」，即係用猛火將蛋黃炒出油，當作藥油之用。小慧話：「呢個絕對唔係偏方，係我一位好勁嘅中醫師教我，我一直都無呢個問題，所以冇乜機會試，但醫師話老一輩嘅老人家都會知，只係老人家唔會上網，所以就冇咁多人講。」
小慧介紹「蛋黃油」畀患有濕疹的好友Carmen試用，5日就已經得以舒緩，Carmen話試用第一次，功效已經立即可見，即時止癢之餘，也讓原本抓破的皮膚傷口火速埋口。雖然至今濕疹未完全痊癒，但手臂位置的情況已經減輕好多，因關節位置經常屈曲，相信需花較長時間。小慧說：「平時類固醇藥膏只能夠1日2次，又唔可以連用超過一星期，但蛋黃油可以一有需要就用。」
咁蛋黃油點樣喺屋企整？其實好容易，老公蘇志威仲「素顏」入鏡幫手煮！首先預備已經烚熟嘅雞蛋，只用蛋黃唔要蛋白～
利用猛火在不銹鋼鑊，不用落油，直接將蛋黃下鑊，她用5隻做示範，如果有需要的人可加至20隻，不停高溫加熱，用鑊剷擠壓，就算炒燶都無問題。
透過不停循環擠壓和翻，慢慢就會炒出大堆油，待冷卻後就可入樽備用。方法好簡單，不過最麻煩的係炒的時候會釋出大量油煙，一定要關開抽油煙機，但為了皮膚好，少少油煙並不是大問題。
小慧表示這個方法又便宜又有功效，建議大家可以從手部小小地方開始試，見到冇敏感，就可以喺面部嘗試。小慧更鼓勵大家試完之後將照片傳給她看，看看成果如何。
(綜合報道/FB)
