陳煒、關禮傑、王賢誌、文凱玲及張學潤等今日到石門為新戲《婚姻的童話？》進行開鏡拜神儀式，煒哥將於戲中以性感泳裝示人，更與小鮮肉阮頌揚有激情戲。煒哥表示泳裝由張學潤準備，坦言對自己身材有信心：「都性感架，要睇到嘅都會睇到，而家都有開始做下運動。」她笑指現實中沒有小鮮肉追求，於是在戲中嘗試。問煒哥可會接受如吳業坤這個類型的小鮮肉追求？她笑謂：「坤哥可以喎，佢最近有腹肌，唱歌又好聽，又識O氹人，但係再細啲變咗湊仔就唔好啦。」
談到電視劇《法證先鋒IV》因「安心偷食」事件要重拍，煒哥亦要參與其中：「應該係6月份開始，我牽涉嘅場口唔多，因為本身同心穎嘅對手戲都唔多，多數係探班嘅時候見到。」
她認為重拍不會浪費心機，假如劇集未能播出，反而更浪費：「補拍係最好嘅解決方法，我知道有啲場會改咗，但係故事上有冇改動就唔清楚，我亦都唔知道邊個代替心穎嘅角色。」早前有一段疑似煒哥的錄音流出，煒哥說：「大家都知嗰個唔係我，把聲完全唔似，不過我冇搵條聲係邊個，真假嘅嘢唔使去考究。」
而最近因「安心偷食」事件，張學潤在專欄影射圈中姊妹花搶人夫的事，張學潤受訪時強調不會透露當事人是誰：「我只係將朋友嘅經歷講出嚟，大家都知道我唔使博見報，有朋友話唔關我事唔需要我伸張正義，但係我認為that’s what friends are for。我加拿大嗰位朋友多謝我，為佢抒發多年來嘅一啖氣，廿幾年朋友咁樣已經好值得，其他人講乜都唔重要。」
至於卸任東華主席的王賢誌，於戲中與文凱玲飾演夫婦，他說：「我哋冇乜親密鏡頭，不過有嗌交戲。現實中我都係講道理嘅，但係我嗌交唔可以帶過第二日，無謂大家唔揪唔睬，而家都一把年紀啦，唔係後生仔嗰啲耍花槍。」問到校園墮樓事件的跟進，王賢誌表示雖然已卸任東華主席一職，但了解獨立調查小組仍然在調查中：「我唔可以成日問住，咁樣會影響佢哋工作，但係我會一路跟進。」
