吳雨霏（Kary）去年6月誕下小王子Asher，日前宣佈再度有喜（相關新聞：https://bit.ly/2UzqWHn），兩年抱兩非常幸福！
Kary昨晚於中環出席活動，她穿上藍色長裙襯波鞋現身。
見到她已經有少少見肚，記者紛紛恭喜Kary，她顯得好開心並透露：「而家OK輕盈，最辛苦係頭兩個月，最初係咁作嘔、頭暈腰痛。第一胎冇呢啲情況，而家成日都湊BB，比較辛苦。」
問到是否因為兩胎性別不同，所以有不同反應？Kary賣關子說：「唔知呢。」她表示已經知道BB性別：「Check咗，但我想保持神秘，遲啲先公布，其實我同老公覺得男女都冇所謂，因為都係上天賜嘅禮物。（大仔Asher知道自己做哥哥？）佢十個月大，未知發生咩事，但我日日都有話畀佢聽。」
Kary又讚老公好好：「佢都有幫我湊BB，而家都有幫手換片餵奶，第一次做人父母係緊張啲，我哋冇畀工人姐姐湊。」
兩年抱兩造人速度非常快，問到是否計劃之內？Kary說：「都幾驚喜，我哋都想快啲有，冇諗過咁快，短期內唔會再生。（如果第二胎係仔，會唔會再追女？）未諗到，但老公都想生三個，到時先算。」
近年專心照顧家庭的Kary，被問到如今再有孕，是否代表復出無期？她說：「再諗下啦，公司同老闆都好好，老闆都有打嚟戥我開心，仲叮囑我唔好着高踭鞋。合約仲有一段時間，同公司關係好好，冇畀我任何壓力，仲叫我出活動一定要着平底鞋，我26歲簽，今年都33歲，係好好嘅合作。」
(綜合報道)
