她前晚在金像獎的造型令人眼前一亮，被指年輕了十歲，甚至有人誤認她是胡定欣。
她笑言：「咁似定欣就唔止後生咗十年。其實要多謝我個化妝師同髮型師，係團隊功勞。（你頒獎時講嘢嘅好好笑。）我唔係跟稿讀，我有改咗少少稿，其實我想改多啲，不過主席爾冬陞話唔好改得太離譜同太多爆肚，因為今年大會有手語同翻譯。」
毛舜筠更大讚今年頒獎禮十分流暢，尤其一班新人的表現很好：「通常新人都會怯場，佢哋只係有少少緊張，但冇失準，我見到佢哋就覺得香港影壇有希望，好享受成晚個騷。」
另外，對於同公司的蔡卓妍失落影后，去年奪影后的她坦言：「佢攞唔到，大家都有啲失望，尤其係老闆，我睇咗佢套戲，佢係一個好用心嘅演員，但《三夫》嘅女主角太強，如果畀多次機會佢，佢繼續努力就一定會得，千祈唔好放棄。（你有冇安慰佢？）尋晚頒獎前我有問佢緊唔緊張，佢話唔緊張，因為覺得自己未必得，我同佢講得獎與否都只係經歷，如果唔得嘅時候，最緊要係有下一次，以往輸嘅時候我都係咁諗，總會得嘅，我就係最好嘅例子。」
(on.cc)
