《第38屆香港電影金像獎頒獎典禮》昨晚完滿結束，雖然蔡卓妍（阿Sa）被視為大熱之一嘅，但最終未能奪得影后寶座，不過相信佢喺唔少粉絲心目中永遠都係最佳女主角！而阿Sa一班好友包括容祖兒、鍾欣潼（阿嬌）、關智斌（Kenny）及張致恒（Steven）亦有留意頒獎禮，個個仲睇得好緊張，阿Sa喺社交網晒出佢哋當時嘅表情。
見到阿嬌緊張到食拳頭、祖兒不停飲汽水同食橙、Steven就食飯，而Kenny緊張到食蕉，真係睇見都笑死人！
就連鄭希怡嘅囡囡「梁浸浸」亦都有拍片為阿Sa打氣，一班好友咁有心，難怪阿Sa咁感動！
佢留言：「禽（尋）晚現場收唔到電話，完咗一出去 ，就睇到呢一堆msg（Message），笑死我又感動死我，人生有一班真正朋友的確好極， 感謝個天，俾（畀）我認識到咁多錫我嘅人， 一定係前世同前世嘅前世同前世嘅前世嘅前世都做咗好多好事 ，今世有咁多人錫我，坦白講我一啲都唔緊張， 因為我心裏有數，反而見到啲屋企人，同埋好朋友仲有fans為我咁緊張，心裏面真係好感動，但更多嘅係唔好意思。#小女子無以為報#惟有唔好諗多#係以愛相許，同埋繼續努力。」
(on.cc)
