香港資深演員兼製片家劉香萍，為捧愛女貝安琪出錢又出力，開戲讓她做女主角，可惜等足四年，貝安琪做埋人母，電影仍未上映，波折重重，其中原因更是因為錯字而損失過百萬，難怪她苦笑說：「真係一字千金。」
為了裁培貝安琪（Ankie）打入內地市場，劉香萍四年前自資開拍電影《一顆心中的許願樹》，由Ankie擔任女一外，還與媽咪一齊做編劇，但此戲講足四年，近日終於上映有期，劉香萍說：「我嘅口號『願望成真，永不太遲』，只要唔好放棄！」但否認為女開戲：「今次搵Ankie唔係因為佢係我個女，佢本身係好出色嘅演員，喺歐洲好有知名度。」
劉香萍透露電影拍攝不是太長時間，只是需時經不同地方搞批文：「首先部戲係英文版，搵香港部門申請上映就話要用廣東話，咁惟有去配音，搞咗一段時間；之後到申請內地播，又用咗半年經過好多批核，點知再出現同一個問題，內地用普通話，又用咗半年時間去配音，三年就咁過去！
其實這四年間，劉香萍指年半前本來有個檔期可在內地上映，可惜又遇問題：「突然發現字幕有幾個簡體寫錯咗，變得好大件事，要重新再整過，但當時已經做咗6,000幾個Copy，仲印晒宣傳照，企牌、廣告等全部收番晒，蝕咗100萬人民幣！」
除了因批文花了不少時間，劉香萍為追求完美，在後期製作上花了不少工夫，動用最強班底，她說：「強勁嘅幕後班底可以做到好優質嘅電影，今次投資咗5,000萬港元，但都超支咗。（係咪碌盡人情卡？）真係好感謝我嘅朋友，好似米雪、李香琴等，李香琴仲唔收我片酬，畀利是都唔要，只揀咗一份禮物。而男主角同做Ankie爸爸角色嘅都係喺德國攞過影帝。」她坦言對今次電影信心十足，透露故事講大學生迷失方向，回香港尋根。
(on.cc)
