古巨基演唱會請得李克勤做嘉賓，已為人父的克勤，十分擔心古巨基（基仔）結婚五年仲未有BB，合唱完《夏日之神話》後，克勤就開始放笑彈：「我聽講尋晚個嘉賓（容祖兒）爆你兩公婆成日摸手摸腳。」基仔回話：「係啦，都唔知有咩咁出奇…」
克勤再話：「其實呢啲情景我都見過呀！哈哈，但係我好想問你，點解你剩係摸呢？點解咁耐都摸唔出啲咩嚟㗎？」觀眾聞言即起哄和應，大力拍掌兼大笑，克勤再繼續：「你唔好剩係摸得㗎，要有舉同埋動先得呀！」
基仔就虛心向克勤請教：「我知你堅呀，你出咗兩大舊！我都要向你請教！」克勤就教路：「我都係譚詠麟教我，你想生仔定生女？生仔呢，阿倫話要倒掛金鈎！生女就要用一招腳趾尾拉西！」
聽到一頭霧水的基仔，唔知好嬲定好笑，反問：「我想問，倒掛金鈎，你掛定老婆掛？拉西我剩係覺得腳趾尾好赤喎！用邊個腳趾尾先？哈哈哈！」
克勤抵死話：「呢啲只可以意會啦！講出嚟冇意思，哈哈哈！你Feel唔Feel到？Feel唔到去問吓校長啦，叫佢詳細教你。」
(facebook / on.cc)
