歌手菊梓喬（Hana）入行以來都宣稱單身，仲話連追求者都冇，好似真係Dry到爆！
唔知係咪因為呢兩日落雨，令Hana有啲空虛寂寞凍，所以就喺社交網分享咗張素顏相並留言：「下一輩子我要做個男生，好好保護我愛的人，這輩子生了在女生的身體上，惟有希望有人好好保護我⋯」
佢仲話覺得自己似男仔多啲，自言有想要保護嘅人，並指：「重擔由我來撐。」更大爆細個入女廁會畀人誤會係男仔添！
粉絲見到偶像咁講，紛紛留言話要一輩子守護Hana，真係有心！仲有粉絲發現Hana眼腫腫，疑似喊過嚟，即留言關心偶像係咪有心事。
除咗呢個發文，Hana仲喺限時動態表示：「不奢求…不妄想…心甘了…已再沒有任何顧慮…」之後更分享咗首英文歌，係Billie Eilish嘅《I love you》，首歌內容係講分手後女仔希望復合嘅心情，歌詞當中有「I can’t escape the way, I love you. I don’t want to, but I love you.（我沒法逃離，我愛你。我也不想這樣，但我愛你。）」，似乎有啲耐人尋味，唔通係「分手總要在雨天」？
(on.cc)
