視后李佳芯（Ali）到快餐店出席AlipayHK活動，問到她可覺得自己改啱名，能夠代言這個品牌帶挈賺錢？她笑言：「呢個真係緣分，其實呢個名係我自己改嘅，細個時都要有自己嘅英文名，我本身想叫Alice，但係覺得Alice Lee呢個名好普通，所以就改做Ali。（呢個名為你帶挈幾多錢？）都係咁啱，呢幾年啲作品都開心有人記得，互相合作都係件好事。」
而問到她理財叻唔叻？她坦言：「以前好渣，股票都係跟人買，但依家就會知道要買磚頭，但我自己依家一舊都冇。（今年想唔想有買樓？）想啊，希望快啦，都有睇定啲，不過依家買都係用嚟投資，當然自住都得。（目標想買幾大嘅樓？）要求唔係咁高，可能千幾呎啦。」記者笑她要求不高，但就要千幾呎，她說：「我唔貪心㗎，不過依家都仲未買到，真係陰功。（你想買咩地區？）唔同階段想要唔同地區，依家就想要近返工嘅。」
問到如果買樓可會問男友陳炳銓意見？她表示：「佢對投資比我更冇concept，仲渣過我。（會唔會同男友一齊合資買樓？）會嘅，不過覺得拍拖都係財政獨立好啲，但到結婚就梗係想叫佢出糧直接入落我度，不過拍拖就真係獨立好啲。」
(on.cc)
